E le’i talia e le faamasinoga le augani atu a Tagaloa Maugaloto Palu e tuu atu se avanoa e tatala ai i tua mai le vaaiga a leoleo, ae alu e vaai lona tinā.
O lana faamatalaga i le faamasinoga ua toe o ia o loo i Samoa o le fanau, ae o isi ua malaga ma faamautū i fafo.
Na ave lea talosaga a Tagaloa e toe tauanau ai se finagalo o le faamasinoga ina ua mae’a ona aumai le faai’uga o lana talosaga e tatala i tua ua teena.
O Tesema o le tausaga na te’a nei na amata ona nofo taofia ai lea matai ma isi tagata e to’afā ina ua mae’a se osofa’iga a leoleo na maua ai ni laau faasāina o le maruana, o paipa e ula ai le aisa, o ututau, ma laau malosi poo fana.
Na maua ai foi se masini o se fua o le mamafa poo se scale faapea ma straw.
O Tagaloa Maugaloto e iai ona moliaga muamua faapea ma o le mafua’aga lea o le tetee o leoleo e tatala i tua.
O le lē talia o lana talosaga ua faaauau ai nei ona nofo taofia i le vaaiga a leoleo i le falepuipui i Tanumalala mo le isi lima masina e faatali ai lona faamasinoga ua faatulaga mo le masina o Aokuso.
O lē ua molia o se tasi sa taalo i le aulakapi liki o le Toa Samoa i tausaga ua tuana’i.
