I le savalia ai nei o le lima masina o faatali se iloiloga faaletulafono a le Loia Sili i le taunuuga o suesuega a leoleo ma le fautuaga e molia le taitai o le vaega faaupufai e puipuia aiātatau a tagata, ona o ni lafoga na faaleaga ai le suafa o le Minisita o Galuega tetele, o lea ua lipotia le teena e le Loia Sili a le Malo o le fautuaga a leoleo e faia ni moliaga.

O le vaiaso na tea nei sa fesiligia ai se loia sinia i le ofisa o le Loia Sili poo fea ua taunuu iai le iloiloga, ae na faailoa mai ai, e iai faaeteetega i le faia o ni moliaga ma le lava o mau e lagolago ai ni moliaga i le faia o upu ma ni faamatalaga taufaaleaga.

O Setema o le tausaga na tea nei ina ua mae’a suesuega a leoleo na ave ai le faila i le Loia Sili mo se iloiloga faaletulafono pe na te lagolagoina pe leai le fautuaga a leoleo i le faia o ni moliaga.

Na toe tuliloa lea iloiloga i se feiloaiga a tusitala ma le sui Komesina o leoleo i le lua vaiaso talu ai nei, peitai e tasi lava le tali e lei mae’a le iloiloga ma o loo faatali pea.

E iai le talitonuga o le vaiaso na tea nei na faatoa mautu ai le faaiuga mulimuli a le Loia Sili i le iloiloga ma lē talia ai le fautuaga a leoleo e molia le susuga Tuilaepa L Sailele Malielegaoi.

Ua fiu e vili le Komesina o leoleo i le faaiuga o le vaiaso ma le amataga o lenei vaiaso fou e fesili iai po ua oo atu lea faaiuga i le mataupu, peitai e le talia lana telefoni feaveai.