Ua teena e le sui faipule o Aana Alofi 1 le Minisita o Faamasinoga le tofa Fesola’i Apulu Tusiupu Tuigamala moliaga e lima ua faaulu atu i le Faamasinoga Faaitumalo, e māfua mai i tapenaga o le palota tele ia Aokuso.
O moliaga ia e fesoota’i i tuua’iga o lona ave o tupe ma taumafa ma le faia o faasalalauga faatosina i upega tafa’ilagi i se auala solitulafono.
O loo finauina ia tuua’iga o ni moliaga i aiaiga o le tulafono o soligatulafono le Crimes Act, ma a faamaonia e mafai ona nofosala i le falepuipui.
O le faaauau ona su’esu’eina o ia moliaga ona ua faamalieina le faamasinoga sa faauluina le tagi ma moliaga i totonu o le 30 aso talu mai le aso 5 o Setema na faasilasila aloa’ia ai le faamaoniga a le Ao o le Malo o sui faipule na manumālō i le palota tele ia Aokuso.
Ua faatulaga o le aso 12 o Me o le tausaga fou e su’esu’e ai molimau e 13 a le itu tagi, lea o loo faamauina ai le suafa o se matai mai le nuu o Vaiusu le tofa Ulugia Mata’u Matafeo o se tagata palota o le itumalo faapalota o Faleata 2.
O le alii loia mai se ofisa loia tuto’atasi poo se private law firm susuga Alex Su’a o loo finauina moliaga ae o le tama’ita’i loia mai se isi foi ofisa loia tuma’oti o Mauga Precious Chang o loo tauaveina le tetee a le faipule o Aana Alofi 1.
