O lenei talosaga ina ia solo fua aunoa ma se faasalaga (discharge without conviction) na faaulu e le tamā ia Tuivasa Ponifasio, 50 tausaga o le afioaga o Laulii ma o le faaiuga na tuuina atu e le afioga i le faamasinoga ia Lesatele Rapi Vaai a’o le’i tapunia Samoa e teena ai lea talosaga. 

O lē o loo talosaga na ioe i ona moliaga o le faaleagaina o se pasi laupasese faaaoga ai se auupega (to’i) lea na ia sasau le to’i (sei tulou) agai le pasi ma ta’ei ai le tioata (windscreen) ma le faata i autafa o le pasi. 

I le ripotia a leoleo e faapea ai o le taimi muamua lenei ua molia ai lea tama ma o lona ita tele i le avepasi ona o le saoasaoa na toeititi lavea ai se tagata o lona aiga (sister in law) na ala ai ona ia tuliloa le pasi ma togi ai le to’i. Mulimuli ane agai sao le avepasi ma ripoti lea faalavelave. 

Na tuu atu ai lana talosaga ma ona mafuaaga e faapea , o le a aafia ai ana pepa mo se nofo tumau i Niu Sila tauala atu i lona toalua. Na ia taua ua maea ona tapena lana talosaga e faaulu atu i le Ofisa o Femalagaiga a Niu Sila. Peitai taua e le afioga i le faamasino e le’o iloa e lē ua molia le aafiaga o ana gaioiga. 

Ua maea foi ona alu le ifoga a Tuivasa i le aiga o le avepasi ma ua talia foi. E ui i lea e le’i talia e le faamasinoga lea talosaga a le tama ia Tuivasa.