Ua faaauau pea ona nofo taofia le tama o Edward Ulberg i le vaavaaiga a leoleo i le falepuipui i Tanumalala e faatali ai le aso o lona faamasinoga ina ua teena e le faamasinoga sili lana talosaga sa finauina e lana loia e tatala i tua i ni aiaiga.
O le Aso Lulu o le vaiaso nei na folasia ai lea faaiuga e le afioga i le faamasino sinia le afioga Lesatele Rapi Vaai peitai o mafuaaga o lana faaiuga ua le mafai ona faailoaina i se poloaiga a le faamasinoga ona o loo loma le suesueina o le moliaga o le fasioti tagata faamoemoeina o le ua molia.
O le tamaitai o le toalua lea o Edward Ulberg na fano lona soifua faatasi ai ma lana pepe e le’i fanau mai i le solitulafono ua tuuaia ai lea ua molia.
O le Aso 7 o le masina fou o Mati o le a toe valaau ai le mataupu mo le sailia o se aso e fofogaina ai molimau a leoleo e lagolagoina ai a latou moliaga o loo tetee iai le ua molia.
