Ua manuia nei le tagata e toatasi lea na faasaoina mai le faalavelave na tulai mai i Siumu i le vaiaso nei lea na maliliu ai nisi o le aufaigaluega o le vaega o Aseta a le Matagaluega o Leoleo. 

Na faamaonia mai e le Sui Komesina o Leoleo le susuga Auapaau Logoitino Filipo i le Samoa Observer le tuua ai e lea alii o le falemai ma ua i se tulaga o loo faasolosolo manuia. E pei ona silafia le faalavelave lea na tulai mai i le Aso Lua na o le vaiaso nei e to’a fa i latou na malaga atu i le loli a le Leoleo e faamoemoe mo Poutasi i Falealili ina ia faataunuu se tasi o a latou galuega peitai e le’i oo lea faigamalaga ina ua tulai mai le faalavelave. 

O le na faasaoina na nofo i le itu o le pasese ae o le toatolu ua maliliu e aofia ai le avetaavale ma sui e toalua na pito i tua o le loli. 

Na faailoa foi e Auapaau e nao le pau lea o le tagata molimau autu i le mafuaaga tonu lava na tulai mai ai lea faalavelave ma o se taimi o i luma ona galulue loa lea o le ofisa e faia se faatalatalanoaga ma lea alii e fesiligia ai vaega sa tulai mai i le latou faigamalaga ae poo le a foi le mafuaaga na lavea ai le latou taavale. 

O se faalavelave na talia gatā e le Matagaluega ona e lei mafaufauina o le a tulai mai lea tulaga ma aafia ai le ola ma le soifua o tagata o le aufaigaluega.