Ua ta’utino le faaulu o le matagaluega o falepuipui ua moomia le faia o se suiga lelei e le gata o le ituaiga siomaga o iai toese ae faapea le faatautaiga o tiute o taitai.
O le tali lea a le Pule Sili o falepuipui, Jeremy Lightfoot e tali ai le lipoti matagā mai le ofisa o sulufaiga e faasino i le pulea ma le ituaiga siomaga o iai falepuipui e 18 i totonu o Niu Sila.
O le suesuega lenei na mafua mai i osofaiga na tulai mai i le toese i Waikeria i le 2020 seia oo mai i le 2021.
O itu lē lelei ua soli ai aiātatau a tagata soifua o le uumi o itula e loka ai, lē lelei totonu o toese, o amio, lē lelei meaai faapea ma le lē vaaia lelei o talavai a pagota.
O le itu e faanoanoa ai le suesuega o le toe maua ai, e lei amanaia e le matagaluega fautuaga na tuu atu iai ua tatau ona sui.
O se suesuega ua avea ma avanoa e toe fotua’i ai le matagaluega, ma o loo tuuaia e le Pule Sili le lē lava o le aufaigaluega o le isi lea mafuaaga tele na mafua ai ona lē atoatoa le auaunaga.
