O le faama’sinoga maualuga i Vitoria na tulai ai se tagata e 73 tausaga le matua o Rodney Lee le igoa, ma ta’utino i ona moliaga o le fasioti tagata i le faalavelave na maliliu ai Saumotu Gasio 62 tausaga ma Tibor Laszlo 72 tausaga.
O faamaumauga mai le faamasinoga ma lipotia e le Alaata 9 ua ta’ua ai o Lee lea ua faaaogā nei se wheelchair na ia tafana nai alii ua maliliu i le Mordialloc Apartment complex i le aso 13 o Ianuari 2022.
Ae o le mataupu e pei ona lipotia e mafua mai i le lē fiafia i le tapē o le paipa i le togalaau i lea nofoaga atoa ai ma isi tuuaiga e pei ona faailoa i le lipoti.
I le faatalanoaga a le 9News ma le alo o le susuga ia Saumotu ua maliu na ta’ua ai e si ona atalii o Rasta, e toatele le latou aiga ma sa feagai uma ma faigata ma e leai foi se isi o fiafia i le mataupu peitai ua oo i le taimi e agai ai i luma ma e talosia ia fetaui se faasalaga e tuuina ia Rodney aemaise e toalua tagata ua ma’umau soifua.
Ua ta’ua mai o loo taofia pea lea alii e leoleo seia lauina lona faasalaga.
E le o ta’ua maia se aso ae o faamatalaga a lana loia i le lipoti ua ta’ua ai ua talia lava e Rodney e soloatoa i le falepuipui ona o le totogi o ana gaioiga na fai.
Na ta’ua foi e le loia o lea alii sa nofo lava na o ia e lei iai se isi e asiasi atu iai ae sa faigata foi lona tuputupu a‘e e aofia ai sauaga.
