O le afiafi o le Aso Lua o lenei vaiaso na toe taunuu manuia ai i fanua, le lato i le ea ma le opea i le ala, o le afioga i le ta’ita’i o le Malo le afioga i le Tamaitai Palemia, afioga Fiame Naomi Mata’afa, ma lana aumalaga i le tuanai o le tolu vaiaso sa toesea ai mo lana uluai malaga faalemalo i Niu Sila, faapea lona auai atu i se fonotaga a ta’ita’i o le Pasefika i Fiti, ma le fono ta’i lua tausaga ma usuia a ta’ita’i o Malo o le Taupulega a Peretania tele.
Sa lē mafai ona pu’eina ni ata ma maua foi se avanoa e fesiligia ai le Tamaitai Palemia mo sona finagalo i le mae’a o ia fonotaga ina ua to’ai taunuu i le malaevaalele faavaomalo i Faleolo, ona sa lē faatagaina e le pulega o malaevaalele. Sa lē mafai ona maua se tali o le fesili pe aisea, ae o ā ni mafuaaga tāua.
O le masina fou o le fono a ta’ita’i o Malo o le Pasefika o le a usuia ma talimalo ai le atunuu o Fiti, ma ua faamoemoe e auai le afioga i le Tamaitai Palemia o Samoa. O le uluai fono lea a Malo o le Pasefika le Pacific Forum Leaders Meeting, o le a auai le afioga Fiame Naomi Mata’afa, talu ona avea ma Palemia o le atunuu aemaise foi o le tula’i mai o le faigamalo fou a le vaega faaupufai o le Faatuatua i le Atua Samoa ua Tasi.
