Ua faailoa e le malo e ala mai i le Matāgaluega o Tupe e lē tatau ona faapopoleina le atunuu ona o loo lava le faasoa i oloa tau suāuu o loo faaulufale mai i Samoa.
O le vaiaso nei i le Aso Lua na taunuu ai le isi vaa suāuu, ae o loo faatali iai vaa suāuu e lua e taunuu i le amataga o le masina o Me ma Iuni.
Ua talosagaina ai le atunuu ina ia una’ia le faaaogā lelei ma faaaogā tatau o oloa tau suāuu i galuega faaauau e pei ona masani ai, ae mo pamu penisini ua fautuaina e faaauau pea a latou galuega masani ae ia faamalosia le pulea lelei o le faatauina atu o lea oloa i le mamalu o le atunuu.
O le au fai taavale ma pisinisi uma ua ave foi iai le tuualalo ma le fautuaga e faaaogā ma le tatau suāuu auā e lē o faaitiitia lea oloa i lo tatou atunuu.
I se pepa o faamatalaga faalaua’itele mai le Matāgaluega o Tupe ua faailoa ai le mātauina o nisi ua soona faatau lea oloa mai pamu penisini ona o le nofo popole ina ne’i faaitiitia le tulaga maua pea o suāuu peita’i o se gaioiga o le a aafia ai ma le faasoa atu o suāuu i auaunaga moomia faapea isi tagata lautele.
O ia faatauga e solitulafono ma e ono tutupu ai nisi mala ma aafia ai le saogalemu o lautele ma ua ave ai le faamanatu i pamu penisini o loo iai lo latou tiute faaletulafono e mautinoa ai tulaga saogalemu uma mo le faatauina atu o lea oloa.
O le fautuaga i le au fai pamu penisini e faatagaina le faaaogā o fagupa’u 5 lita e utu ai le penisinisi pe a saogalemu ma talafeagai mo le faaaogāina e konekarate ma vaa fagota.
O le tasi o fautuaga i le au fai pamu penisini e tatau ona latou teena soo se faatau e lē talafeagai ma le saogalemu le fagu pe iai foi ni masalosaloga i le teuina poo le faaaogāina o le suāuu.
O loo faaauau pea ona māta’itū e le Malo le tulaga o le feeseesea’iga i Sasa’e Tutotonu i le taua o loo tula’i mai ai, ma o le a tuuina atu ai i le atunuu faamatalaga lata mai i ni aafiaga i le maua pea poo le sapalai o oloa suāuu, faapea le tau e faatau atu ai, e pei ona faailoa i amataga o masina ta’itasi.
O lea o le a mae’a le masina o Mati ma ua tulimata’i nei tau fou o penisini ma suāuu mo Samoa i le masina fou o Aperila o le a iloa ai se siitaga fou pe tumau pea tau o iai nei, ia pe o le a iai se pa’ū.
