A o loma le faaaliga o fatuga o pese ma musika faaonapo nei i le masina fou o Me, ua taualuga galuega o lenei masina o Aperila i le faaaliga o musika Jazz, ua malaga mai ai le faaaili a le fitafita o le Malo tele o Amerika ua ta’ua o le U.S. Pacific Fleet Band, e faafiafia i lea faaaliga e faia i le Aso Sa o lumanai nei i le faletalimalo o le Taumeasina Island Resort.
E muamua faafiafia lea faaaili i le maketi a le au faipisinisi ma faletalimalo i le po o le Faraile le faaiuga o lenei vaiaso, sosoo ai ma se latou faafiafiaga i le faleaiga o le Sails i le po o le Aso Toonai ae faaiu i le faaaliga o musika Jazz i le po o le Aso Sa.
Na faia se ‘ava faatali e faafeiloai ai le faaaili a le fitafita a Amerika i le maota Samoa o le Pulega o Tagata Tafafao i le afiafi o le Aso Tofi sa tapena e le ofisa o le Malo Amerika i Samoa.
Ua faailoa e le komiti o tapenaga o le a iai ma nisi o tagata talenia ma iai tomai i lea ituaiga o fatuga poo musika o le a faafiafia i le faaaliga.
