Ua taua’ao e le Palemia o le atunu’u o Fiti le afioga, Tagaloa Sitiveni Rambuka le fa’ailoga tauāloa mai le Faalapotopotoga o Tusitala ma le Au Faasalalau a le Pasefika le PINA, ona o lona faatāua o le saolotoga e faatino ai galuega a ē o galulue i lea tomai i lona atunu’u.

O le tausaga e 2023 ina ua tula’i le faigamalo a lea ta’ita’i na soloia ma aveesea ai le tulafono na fausia e le fagamalo talu ai a le palemia o Frank Bainimarama, sa faamata’uina ai le faatinoga o lea galuega i totonu o Fiti.

Advertisement

Ua aumai ai se finagalo o le Palemia ua ave iai le faailoga tauāloa i le tāua o lea auaunaga i faigamalo faatemokarasi, aemaise i le Pasefika.

Ua ia toe fafagu ai i usugafono o loo auai i le fono a le PINA taimi na ia taita’ia ai le ulua’i fouvale poo le coup na aveesea faamalosi ai le faigamalo sa iai i le tausaga e 1987 sa ia matuā taofiofi ai le faatinoga o lea auaunaga.

Fa’aalia e le ali’i Palemia i tusitala, o le taofiofia o le saolotoga e faatino ai lea tautua ua le ese ma se pulega temokarasi e fa’afoe mai i totonu o se potu pogisā.

Fa’aalia e le Palemia o Fiti e na te lē aiāina pulega a isi malo e pei o Samoa ae o lana tu’ualalo e tatau i faalapotopotoga o faamaopoopoina lea tomai i soo se atunu’u o le Pasefika e pei o Samoa o tula’i mai ai ni tulaga faapea, ona finauina o latou malo e toe fetu’ut’uuna’i ma silasila mamao i le tāua o le maua e tagata o faamatalaga moni ma sa’o e ala i le galuega a tusitala ma tagata faasalalau poo le media.