O le Ofisa Sili o le pulega o le faalapotopotoga o taaloga i Samoa le SASNOC, o le Peresetene o le faalapotopotoga o taaloga siisii u’amea mamafa a le atunuu ma nisi o sui o faalapotopotoga o isi taaloga i le atunuu, sa faatalia le toe taunuu manuia i Samoa o le ‘au masii sa tausinio i taaloga laiti a le Pasefika na faia i Sipan le laumua o le atunuu o le Atu Mariana i Matu.
O le afiafi o le Aso Lua i le malaga a le Fiji Airways na toe malaga mai ai le ‘au ma latou pine e 21 na manumalo ai. E 8 pine auro, 5 pine siliva, ae 8 pine apa memea.
Sa saunoa faafeiloa’i le Peresetene o le taaloga siisii u’amea mamafa a Samoa le afioga Tuaopepe Jerry Wallwork ina ua taunuu manuia le ‘au taaalo a Samoa i taaloga laiti a le Pasefika. Ua taliu mai le ‘au masii a le atunuu ma le tulaga fitu i le tuuaofa’iga uma o pine a atunuu e 19 sa tausinio.
O Papua Niu Kini ua sola ma le manumalo i le aofa’iga o pine auro, siliva, ma apamemea na manumalo ai. E 33 auro, 28 siliva ma pine apamemea e 19 na manumalo ai Papua Niu Kini. Tulaga 2 le atunuu o Tahiti 22 auro, 15 siliva ma apamemea e 21, ae tulaga tolu le Atu Mariana i Matu sa talimalo e 16 pine auro, 13 siliva ma pine apamemea e 9.
