O lea ua i laufanua nei o Samoa le pulega ma le aumalaga a le Manu Samoa ma nisi o le autaaalo ina ua mae’a le taamilosaga tele a le Pacific Nations Cup lea na siamupini ai.
Na faatalia e le Ofisa Sili o le Lakapi Samoa, Faleomavaega Vincent Fepuleai ma nisi o le aufaigaluega le taunuu atu ai o le faigamalaga a le Manu Samoa i le malaevaalele i Faleolo.
E pei ona silafia o le faai’uga o le vaiaso na te’a nei lea na suipi ai le ‘au a le atunuu i le sailiga lea o se siamupini o le taamilosaga Pacific Nations Cup lea na talimalo ai Fiti i le malae i Lautoka.
I nisi o lipoti a le Rugby Pass na faailoa ai e le faiaoga a le ‘au a Fiti lea na taaalo ma le Manu Samoa ia Vern Cotter, e faigata le faia’ina peitai o le a avea le faia’ina i le faai’uga o le vaiaso ma lesona lelei e tapena ai le ‘au a Fiti i le Ipu o le lalolagi i le tuasaga fou.
