O le Aso Gafua ananafi i Samoa na faato’ā taunuu ai le vaa oloa tele ma afi eletise e lima o le a lisi faavaitaimi e le faalapotopotoga o le malosi tau eletise, ma ua faailoa ai e le Ofisa Sili o le pulega o lea faalapotopotoga a le malo, e tatau ona oo atu i le aso 15 o le masina lenei o Aperila, ua faaola ia afi ma lē toe pe ai ma le eletise i Upolu, o lona uiga o le a taofia ai ma le toe faasoasoaina o lea auaunaga e pei ona faatino ai i le taimi nei.

Ua faailoa e le Ofisa Sili o le eletise le afioga Faumui Iese Toimoana lea fuafuaga, a o iai le motu o Upolu i aiaiga o faalavelave matuiā ona o le faaletonu o le eletise mo le 30 aso.

O le feiloa’iga a tusitala ma le Ofisa Sili o le faalapotopotoga o le malosi tau eletise ma le ta’ita’ifono o le komiti o tapenaga o faalavelave matuiā, le Ofisa Sili o le Matāgaluega o Puna’oa Faalenatura ma Si’osi’omaga, na fesiligia ai i le tapenaga mo se faamāmā avega mo aiga ma pisinisi ua faaleagaina nisi o a latou meatotino e pei o ‘ea mālūlū ma pusa’aisa ona o le pē faafuase’i o le eletise.

Le afioga Lealaisalanoa Frances Debra Brown Reupena, o le Ofisa Sili o le Matāgaluega o Puna’oa Faalenatura ma Si’osi’omaga, o ia foi lea o le ta’ita’ifono o le komiti o galuega lavea’i i taimi o faalavelave matuiā.