E lua sela o le falepuipui i Tanumalala na talepe e nisi o pagota o loo nonofo ai ma tuli o latou faasalaga ae o tua o lea faamoemoe ia sosola, o le saunoaga lea mai le Sui Komesina o leoleo Auapaau Logoitino Filipo ma ia faamatala ai le gaioiga na tulai mai  le Aso Lua o le vaiaso nei. 

O lenei faalavelave na nanati atu ai le to’atele o malu o le malo i Tanumalala  e fesoasoani i  leoleo o le Falepuipui. E silia i le 50 pagota na ō i fafo ma sela ma fai ai se gaioiga o le faataute’e i leoleo o le toese i se taumafaiga na faaalia e le Sui Komesina sa fuafua e sosola ese ai ma le falepuipui. 

Sa lē mafai ona taunuu lea gaioiga ona sa malosi le puipui atu a leoleo o le toese ma e taunuu atu malu o le malo o loo i totonu pea o le lotoā pagota na oese mai o latou sela ma toe faafoi i totonu o sela na o latou talepe loka o faitotoa. 

O le saunaoga a Auapaau o loo faia se suesuega i le ofisa suesue a leoleo i Apia e saili ai le mafuaaga tonu o le faia e pagota o lea gaioiga ae poo le a foi le mafuaaga. O le taimi nei e le’o toe iai se avanoa e asia ai e aiga o i latou o loo tuli faasalaga i le falepuiupui ona o loo tapunia uma le atunuu ona puipuiga mai le faama’i Koviti19.