O le taumafai o se sui o le Mongrel Mob e sola ese ma leoleo na afua ai ona oso i totonu o se vaitafe ma malemo ai, o le faaiuga lea mai le coroner sa suesueina lea mataupu.
Na maliu ai Norman Lee Te Rangi 24 tausaga i le 2019 a o lea faatoa faamatuu mai le faaiuga a le coroner i le mafuaaga o le maliu.
E faapea se faamatalaga a o taumafai lē ua maliu e sola ese ma leoleo na ia puna ai i totonu o le Tarawera River ma aau ese mai le vaega sa iai leoleo.
Fai mai lipoti ua tele taimi e taumafai ai leoleo e pueina Te Rangi peitai e le manuia ona e fesoasoani foi iai ma nisi.
Ua faailoa e le Herald na taumafai iai galuega laveai a leoleo peitai e lei manuia, o le iuga foi o lea mataupu ua ta’ua ai sa faatino e leoleo gaioiga uma talafeagai ma sa lamatia ai foi ma soifua o malu o le malo e toalua na o ane i le vaitafe e aveese mai le tino maliu o Te Rangi.
