A lē auai Aukilani i le fausia o le Three Waters, o le a faaopoopo le tau e totogi e le aai tele mo le suavai.
O le tali mai lea a le tamaitai Palemia Jacinda Ardern e tali ai le pulenuu fou o Aukilani Wayne Brown lea ua ia faatalosagaina le faamuta o galuega fesootai a le Watercare poo le pulega o le suavai ma le Three Waters.
Saunoa le palemia, o le Three Waters o le mafuaaga na faia ai ia maualalo ai le tau o le suavai e totogi e tagata, ma i le faataatiaga ua iai pe a alu ese Aukilani – o le a taugata le suavai faaaoga latou te totogia.
O loo iai le faamoemoega o Jacinda ia mafai ona tau fai lagona le galulue faatasi ma o se itu o le a agai iai la laua feiloaiga ua talo ma le pulenuu o Aukilani a taeao.
A o finau malosi mai ai pea le palemia i le Three Waters poo le fuafuaga a le malo lea e aumai ai pulega a le suavai a le atunuu atoa i lalo o taitaiga a pulega e tolu, e foliga mai e faigata ona suia le faaiuga a le pulenuu ma o se mataupu foi o lea lava na ia tautino ai a o faia ana faalauiloa o le palota faaitumalo a Aukilani.
