O le tama’ita’i loia mai le ofisa loia o Lui & Chang – Barristers Solicitors Consultants ua avea nei ma Loia Sili a le malo i se tulaga lē tumau, e faatali ai le faasalalauina o lea avanoa ma maua se tasi e tauaveina lea tofiga.
Ua faailoa lea filifiliga e le afioga i le Palemia, o le minisita foi o loo iai le vaaia o le ofisa o le Loia Sili le susuga Laaulialemalietoa Leuatea Polataivao i le feiloa’iga ma le vasega o tusitala i le Aso Gafua.
O Mauga Precious Chang mo le silafia sa galue muamua i le ofisa o le Loia Sili a le malo i ni tausaga ua mavae, ma filifilia ai e avea ma Faatonu sa faauluulu iai le ofisa sa finauina matāupu tau faamasinoga o soligatulafono i le faamasinoga poo le Director of Public Prosecution office lea na amata faagaioi i le tausaga e 2016 ma tuto’atasi ai lea auaunaga a le malo mai le ofisa o le Loia Sili.
Peita’i na tapunia e le malo lea ofisa i le tausaga na sosoo ai 2017 ma toe ave ai ana galuega i le ofisa o le Loia Sili a le malo.
O le tausaga e 2022 na toe silasila ai le malo i lena taimi e toe faatū lea ofisa ae e oo mai i le taimi nei e le’i faatinoina.
