O le Aso Lua o le vaiaso fou, 26 o Aperila o le a faataunuu ai le tauaofiaga a le Palemene mo ana fonotaga faaauau i le tuanai ai o ni vaiaso na tolopo ai ua lē faataunuuina ona o le tapunia atoa o le atunuu ina ua pepesi i tua le faama’i.
Ua faamaonia mai e le afioga i le Fofoga Fetalai, Susuga Papalii Li’o Oloipola Ta’eu Masipa’u, o le tauaofiaga o le a faagasolo o le a talanoaina ai nisi o mataupu tuua mai le fonotaga mulimuli na usuia i le masina o Fepuari.
O se tasi o mataupu tāua o le a folasia i le tauaofiaga i le vaiaso asau o le lipoti a le komiti faapitoa a le Palemene sa suesueina le eseesega o kopi o le tulafono o faamasinoga o fanua ma suafa o le tausaga e 2020.
Ua avanoa le nofoa e tasi o le Palemene ina ua tuumalo le sui faipule o Gagaifomauga Numera 2 ma e lei faailoaina se taimi e faia ai le palota laititi e toe saili ai se sui usufono o lea itumalo faapalota sa seei ai le Afioga Va’ele Paia’aua Iona Sekuini o se sui faipule o le vaega faaupufai o le Faatuatua i le Atua Samoa ua Tasi
