I le lata i le tolu vaiaso talu ona mae’a faataoto i le laulau a fono a le Palemene le tala faatatau autū o le Tupe lona lua a le faigamalo a le Faatuatua i le Atua Samoa ua Tasi, o le Aso Lua o lenei vaiaso i taualumaga faaauau o le Fono Aoao Faitulafono ua soalaupule ai lea tala autū lona lua ma le faamoemoe e mae’a talanoaina ma pasia a o le’i mae’a le masina nei o Iuni e muta ai le tala o le tupe muamua na pasia i le masina o Setema o le tausaga na te’a nei.
E 964 miliona tala le tuaofaiga o tupe totogi mo galuega a le Malo mo le isi 12 masina o le tausaga faaletupe fou ua fuafuaina i le tala autū o le tupe loa lua. O le Matagaluega o le Soifua Maloloina o loo maualuga ana tupe faaalu i lea fuafuaga e 140 miliona tala.
O le fuafuaga tau tupe foi lea a le faigamalo fou ua faatulaga mai ai le 51 miliona tālā i lalo o le Matagaluega o Tina ma Tamaitai Atina’e o Afioaga ma Aga Fesoota’i mo le faatinoina o le polokalame fou o le atina’e o itumalo faapalota lea o le a tuuina atu le ta’i miliona tālā mo ia fuafuaga tau i le atiina a’e mo le manuia lautele o tagata o itumalo e 51.
