Ua taualuga le Koneferenisi tele faaletausaga a le Ekalesia Metotisi Samoa i le faauuina o Faifeau Faamaoni e to’a 12, ma le faailoa foi o faifeau e to’avalu ua mālōlō manumalo i le tuanai o tausaga e tele sa galulue ai i le tausia o aulotu, ma le vaega tāua e faai’u iai Koneferenisi o tausaga ta’itasi, o le lauina o le Tusi Tofiga.

O lea vaega tāua na faatino i le afiafi o le Aso Sa na tolaulau ai faifeau ua siitia mai Matagaluega sa galulue ai i isi Matagaluega e lē gata i Sinoti i Samoa, ae faapea i Sinoti i atunuu i fafo. Na faalauiloa ai foi le aufaigaluega faifeau ua tofia e galulue i matafaioi eseese mo le tautuaina o le ekalesia aemaise o faifeau ua mālōlō manumalo ma i latou ua mālōlō gasegase, faapea nisi o le aufaigaluega ua fai i lagi le folauga. Ua toe faatumauina tofiga o le ekalesia i le Pelesetene, Teutupe ma le failautusi ina ua toe filifilia a o faagasolo le Koneferenisi tele.  

O le vaiaso nei o le a amata faagasolo ai se tasi o i’ugafono tāua o le toe iloiloina lea o le Faavae o le ekalesia faapea ma le faavae o le tasi o itutino tāua o le Mafutaga a le Auuso Fealofani. Ua faailoa e le Failautusi Aoao o le ekalesia i le mae’a o le lauina o le Tusi Tofiga o le Koneferenisi o le tausaga 2022, o le aso 14 o le masina fou o Aokuso e tatau ona lauga uma ai Faifeau ua siitia i aulotu ua tofia e galulue ai.