O le afiafi o le Aso Faraile na te’a nei i le taimi o le mānava o galuega na faatino ai se osofa’iga a leoleo i le pitonuu o Leonē i Apia ma pu’eina ai ni tagata se to’alima e aofia ai se tamaitai ona ua masalomia i lo latou umia o nakoti e pei o le ‘aisa ma maruana.
Faaalia e se molimau faatuatuaina o se osofa’iga e le’i faigofie ona, a o taumafai leoleo e faatino le latou galuega, ae e iai nisi o tagata o lea pitonuu na latou tau’ai i maa taavale a leoleo.
Na fai tuliga a leoleo ma nisi o latou o lea pitonuu na faia lea gaioiga ma ua molia i le faalavelave i le galuega a leoleo ma le umia o ni aupega mata’utia o maa na latou faaaogā.
Faaalia e le molimau o le osofa’iga foi lea na maua ai se tinoitupe ma ni laau malosi o ni fana laiti e faasā ona faaulufale mai i le atunuu.
O loo faaauau su’esu’ega a leoleo ia i latou ua taofia nei ma molia i solitulafono tau i nakoti faapea le tau’aiga o taavale a leoleo.
