O Meleisia le tasi o atunuu i le vasa Asia o se paaga totino a Samoa ua savalia nei le 42 tausaga o le la mafutaga.
O se atunuu talu ona galulue faatasi ma Samoa i tulaga faavaomalo, o loo faaauau pea ona fefaasoaa’i i mataupu tau i le atina’e o malo e lua.
O le Komesina Maualuga fou o le Malo o Meleisia mo Samoa ae faamautu i Niu Sila na tauaao atu i le afioga i le Ao o le tatou Malo, le afioga Tuimalealiifano Vaaleto’a Sualauvi II, ona tusi tofiga poo credentials e faamaonia lona tauaveina o lea tofiga o lona Malo.
O le tamaitai Komesina Maualuga o Masita Marzuki sa galue i le ofisa o lona Malo i Abu Dhabi i le atunuu o le United Arabs Emirates, a o lei filifilia e galue o se Komesina Maualuga o Meleisia mo Niu Sila ma Samoa.
Ua faailoa i se pepa o faamatalaga o le tamaitai Komesina Maualuga fou foi, sa galue i isi ofisa o lona Malo i nisi o atunuu, faapea ona galue o se tamaitai faatonu i polokalame i se faletelevise i Meleisia a o lei galue i le ofisa o le va i fafo o lea Malo, ma amata galue ai e fai ma sui o lona atunuu i isi Malo o le lalolagi.
