Ua toe faaauau faatalanoaga mo le aoina mai o finagalo tagata mai nuu ma afioaga o loo tulata i nofoaga e pue ai le suavai mai le vaitafe o le Vaisigano, a o tālia ai le fuafuaga e fausia se faatanoa vai tele i Alaoa.
O le afiafi o le Aso Lulu o lenei vaiaso e faia ai le isi faatalanoaga faalauaitele mo le faataoto ai o se fuafuaga e lima taitaiina ai le fausia o lea faatanoa vai, o loo lagolago iai nisi o nuu o loo aafia i le galuega ae o loo tetee iai finagalo o nisi.
O le tāua o le sailia o finagalo ma le tuuina atu o fesili ia i latou o loo lotolotoi i le tapenaina o le galuega o le a maua ai tali i ni atugaluga ma ni faanenefu o loo faavaatu’ia ai lagona o nisi.
I se faasalalauga faalauaitele o loo faailoa ai o se tasi lea o poloketi o fuafuaga a le Malo na amata tapena mai i le tausaga e 2019, ma ua lata ina mae’a faatalatalanoaga ma le mamalu o le atunuu o alala i nuu e pei o Maagiagi, Vailima, Alaoa, Lelata, Maagao, Faatoia, Malifa, Apia, Vaiala ma Moataa.
O loo iai lagona i popolega i aafiaga o le siosiomaga pe a fausia lea faatanoa vai, peitai ua faailoa i le faasalalauga faalauaitele mai le Matagaluega tetele a le Malo, e tāua ai le maua o finagalo e fuafua iai le faataotoga o le galuega mo le lumanai.
O le faletupe o atiina a’e o Asia o loo faamoemoe na te faatupe le fausia o le faatanoa vai fou i Alaoa.
O le fogafale 6 o le maota o le Ioane Viliamu i Tamaligi i Apia o le nofoaga lea o le a faia ai le faatalatalanoaga i le afiafi o le Aso Lulu, o le vaiaso nei.
