O le tau faasoa o suauu e utu ai vaalele e afea Samoa ma ua faaitiitia ai malaga a vaalele ile va o Samoa e lua, ma ua aafia ai foi ma uta feaveai e vaalele tetele, e iai le talitonuga e tatau ona toe fofo lea tulaga pe a taunuu le vaa suauu ile ogatotonu o lenei vaiaso fou.
O se pepa o faamatalaga mai le kamupani e tasi o loo faatauina atu suauu ma penisini ile atunuu le Petroleum Products Supplies poo le PPS, ua faailoa ai o le maualuga o le manaomia o suauu e utu ai vaalele talu ona toe tatala malaga masani ile amataga o le masina o Aukuso, o le mafuaaga lea o le faaitiitia o suauu mo le utuina o vaalele e taunuu ma malaga ese ma Samoa.
O le mafuaaga foi lea ua faailoa e le kamupani ua faasoasoa ai ile taimi nei lea ituaiga o suauu. O le tasi mafuaaga ua faailoa e le kamupani o malaga a vaalele o fitafita sa afea le atunuu oni malaga sa le fuafuaina sa malaga mai ai nisi o malo mai fafo, ile taimi o polokalame o faafiafiaga o le ono sefulu tausaga o le Tutoatasi.
O le tasi foi pogai o le vave alumia o suauu utu vaalele ona o atunuu uma o le pasefika ua tele ina toe tatala malaga masani ma ua maualuga ai ma le manaoga mo lea oloa.
