Ua tatau i le malo ona faalautele ana fesoasoani tupe se’i fesoasoani ai i le toatele o fanau o loo ola i le mativa.
Ua tuuina mai lenei manatu i le mae’a ai ona faailoa mai e le vaega o faamaumauga ananafi e lei iai se suiga i le toatele o fanau o loo ola matitiva i le lua tausaga talu ai.
O loo sau i lea lipoti o le 12% o fanau Niu Sila e omai aiga e maualalalo tupe maua poo aiga e i lalo mai o le 50% tupe maua a aiga ae e lei aveesea totogi o fale.
Peitai, o fanau Pasefika e toatele ai lava ma o i latou nei e omai mai aiga e maualalo tupe maua.
Fai mai ai le sui o le Greens, o Ricardo Menendez March e moomia e le malo ona faia se isi faiga e sii ai lana fesoasoani i le mativa o fanau.
Ae i nisi o sui o kulupu o loo tutu malosi mo fanau nei e ola matitiva, o lea ua faatalosagaina le malo e faia se suiga ia faaopoopo ai tagata agavaa i tupe a tamaiti o loo maua i vaiaso taitasi.
Ae na ta’ua e le sui Palemia o ia foi o le minisita o le Social Development, Carmel Sepuloni e lei iai se faaiuga i le taimi nei ma o loo vaavaai pea i fautuaga ua tuuina atu.
