I le saunoaga faataupou a le tamaitai faipule faaopoopo mai le itumalo o Aleipata Itupa i Lalo, le Afioga Faagasealii Sapoa Feagia’i na sosoo ai ma le folasia o ona manaoga mo nisi polokalame auā se manuia o lona itumalo. O inā na ia toe tatalo ai i le afioga i le Minisita o Galuega tetele a le Malo, Afioga Olo Fiti Vaai, e fia faaauau pea le poloketi o le malaevaalele e pei ona amata mai le paea’iga talu ai. 

Saunoa Feagia’i, afai e tupu se mala faalenatura ma afaina ai le malaevaalele i Faleolo, ae o le aogā lena o le faataunuu pea o le malaevaalele i Ti’avea, e aogā e tua mai i ai le atunuu, ma faataunuu mai i ai nisi fesoasoani mai atunuu mamao. E aogā foi mo afioaga o loo latalata mai i Ti’avea, e agai mai i ai, aemaise lava ua sii foi le tau o le penisini mo feoaiga o taavale.