O lea ua tatala ulua’i ofisa tutotonu e lua i le motu o Upolu mo galuega o le a tapuvae tasi iai mo le atiina a’e o itumalo faapalota e pei ona taoto le fuafuaga a le faigamalo fou e tasi le miliona tala. O itumalo o Faleata 2 ma Sagaga 4 ua muamua mae’a tapenaga o latou ofisa tutotonu na tatala i le faai’uga o le vaiaso ua te’a atu nei.
O le Sui Palemia, le afioga Tuala Tevaga Iosefo Ponifasio na faauluulu iai malo valaaulia i le tatalaina o ia ofisa tutotonu, ma sa auai ma nisi o Minisita o le kapeneta ma minisita lagolago ma sui o komiti filifilia mo ia itumalo faapalota.
Leatinuu: “O le aofa’iga o le tupe ua alu i le faatinoina o lenei galuega, o le matou renovation e $25,800. O le aseta mo tulaga o le faaasetaina o le tatou fale, e $52,859. O office supplies e $7,846 ia ma isi mea ua mafai ona teuteuina ai, e $1,100. O le aofa’iga atoa ua alu i lenei faamoemoe e $87,600…..
…Ia ona na amata ona galulue mai le matou komiti ia Fepuari, Fepuari, Mati, Aperila, Me, Iuni. Ia o lea la na totogi ai loa o latou alauni, e ta’i $300 i le masina, ma alu ai loa le aofa’iga o se tupe e $17,100. O le matou fale lea, o loo lisi mai le afioga Laulu Henry Westerlund. O ia lena o loo fai mai ai le matou lisi. E $2,000 i le masina, faato’ā amata ia Iulai ona totogi le matou lisi, pe a maua mai le $1 miliona. A o le taimi lenei, o le aofa’iga lena, po ua $99,700 se tupe ua uma ona faatino e fuafua i ai le ofisa, ae le’i lavea ai la le lisi lea faato’ā amata ona faatino ia Iulai, e lima tausaga le matou lisi ua uma ona saini.”
O le Sui Palemia na saunoa i le tatalaina o le ofisa tutotonu o le itumalo o Sagaga 4.
Tuala: “Tau ia ina ia manuia tele fuafuaga ua faataatia e lenei itumalo, e tauala atu i lenei ofisa matagofie. Ia pei foi ona alaga lo tatou minisita o Tupe i lenei taeao, ia o lea ua tatou sao mai totonu ua tatou ulufale, ua tatou vaaia le galuega matagofie. Lau afioga Tagaloa, le minisita, faafetai malo le galue. E ao lava ona faaleo le tiute o le minisita o tupe i le tele o taimi, leaga o i lea e tupuga mai ai le tatou manuia. Ae lē galo ai le minisita o Tina ma Tamaitai, le afioga ia Leota Laki, ia e mafai ona ou fai atu i le taeao lenei, o loo galue o ia i le fesootaiga faifai pea ma itumalo. Ou te iloa o la ua malaga lana afioga i Savaii, ona o le tulaga lava o le tau faamae’aina o fesoota’iga i tulaga lelei ina ia taoto le faamoemoe o le Malo aemaise foi se filemu i totonu o nisi itumalo, o le ala lea ua lē mafai ai ona afio mai lana afioiga i lenei taeao. Ae o loo iai sui o le ofisa sili aemaise foi le matagaluegea o loo faatasi mai lenei taeao. Ia manuia toe taimi o lenei aso. Ia faataumamao le maa tui ma le maa gao ma le maa faalavea aao i o outou afioga uma pe a ta’ape le fili alii.”
O le tatalaina o le ofisa tutotonu o le itumalo o Sagaga 4 na faailoa ai e le Sui Palemia le valaaulia o lea itumalo na te saunia se pese o le atoaga o le 60 tausaga o le Tuto’atasi o Samoa i faafiafiaga o le a faia i le masina o Setema. O le valaaulia lenei ua faamautu i se finagalo o le komiti o le tuto’atasi o loo ta’ita’ifono ai le ta’ita’i o le Malo le afioga i le Tamaitai Palemia afioga Fiame Naomi Mata’afa.
