O le faamautu ai i Samoa o le Pule o le Iunivesite a le Pasefika e mafua i le taofia e le faigamalo sa iai a Fiti le toe ulufale atu ma faamautu i le nofoaga tutotonu o le iunivesite o loo i Suva, o le suiga o faigamalo a le atunuu tuaoi ina ua mae’a le faigapalota tele a Fiti i le faaiuga o le vaiaso na tea nei, ua toe tatala ai e le Palemia filifilia o lea Malo o Sitiveni Rabuka, le toe ulufale atu o le Pule Sili le alii Polofesa o Dr Ahluwalia ma lona faletua ua faamautu nei i le lala o le iunivesite a le Pasefika i Alafua.
Ua faaalia e le Palemia o Fiti ua tulai nei lana faigamalo soofaatasi ma isi pati faaupufai e lua a le Palemene a lea Malo, e matua leai se mafuaaga faaletulafono na taofia ai e le faigamalo a le alii Palemia o Bainimarama le ulufale atu o le alii Pule e faatino ona tiute ma nofo i totonu o Fiti.
O le masina o Mati o le tausaga nei na amata faamautu ai i Samoa le Pule o le Iunivesite a le Pasefika ma faatino atu ai ana galuega, ma o faauuga foi sa faia i Fiti sa le mafai ona auai ona o le taofiga a le ofisa o femalagaa’iga a lea atunuu.
