I le 27 o matafale o le aulotu o le Ekalesia Faapotopotoga Kerisiano Samoa i Sale’aula, o lea ua taunuu lo latou faamoemoe sa tautiga ai e saili seleni ma isi fesoasoani, auā le fausiaina o se Malumalu Fou.
O le Aso Tofi o lenei vaiaso na faaulufale ai le Mila ma le ‘Ala o se miti ua taunuu a le faafeagaiga ma le faletua faapea lana aulotu. O se galuega e lē taugofie ona ua tatou iloa ma silafia le tulaga ua iai le tau o oloa i lenei vaitau aemaise i oloa faufale mai fafo. Na amata le galuega i le tupe e 140 afe tala a le aulotu, ma osi feagaiga ai ma le kamupani o le Evaeva i le tau e tasi le miliona tala e faatupe uma ai oloa faufale mo le Malumalu.
Ua tele ina totogi uma le tau o le galuega i le kamupani ae o loo iai le aitalafu e 360 afe tala. O nisi o totoga i le lotoifale o le Malumalu sa fai meaalofa iai nisi o alo ma fanau a le nuu ma le ekalesia, ae o le tele lava o le galuega sa limalima faatasi iai le faafeagaiga ma lona faletua ma le aulotu. O le afioga i le Sui Palemia afioga Tuala Tevaga Iosefo Ponifasio o le sui faipule o Gagaemauga numera muamua e aofia ai ma le afioaga o Saleaula na faatumutumu iai mamalu o Malo Valaaulia i le faaulufalega, faapea le paia maualuga i Minisita ma sui Minisita o le Malo.
Sa molimauina i faasalalauga i luga o upega tafailagi mai le faamoemoe o le ekalesia le tele o taalolo a nisi o ekalesia, o aiga ma tamafanau a le aulotu sa molimoli ai o latou alofaaga ma fesoasoani e lē gata i Ie tetele o le Malo a o meaalofa tupe.
