O le susuga ia Samoa Mckee Te’o e mai le afioaga o Laulii ma Samatau, ae o lona faletua ia Lisa Te’o e mai le alalafaga o Lufilufi, Leauvaa ma Aleisa, na amata mai le la tautua i totonu o Niu Sila i le vali, faapea gasesega o taumafata i faalavelave, ma tau amata ai se pisinisi fale’aiga auā le fofoga taumafa o le atunuu.
O le faaiuga o le tausaga 2019 na amata ai loa le la tamai fale’aiga i Mt Roskill e faataunuu ai se moemitiga ua leva ona naunau ma moomoo iai.
E lei leva ona amata le auaunaga i lea pitonuu o Aukilani, ae oso loa le faama’i o le koviti ma poloka ai le tautua.
Ma o lea faafitauli e lei muta ai le ola finau o le susuga ia Samoa Mckee ma le faletua ia Lisa i le faamalolosi lea e saili pea se manuia mo le aiga ma fanau.
Na toe mafai ona tatala le auaunaga i le atunuu e ala lea i le fale’aiga, ae sa o faatasi ma le tautua i le gaseseina o meaai mo faalavelave i le atunuu.
O Oketopa i le tausaga ua mavae na see mai ai le fale’aiga a le Tuisamau i Avondale ae faaaogā le fale sa iai i Mt Roskill e gasese ai meaai mo faalavelave.
O le Aso Toonai ua mavae na tatala ai le isi fale tele a le Tuisamau le Manhattan i Mt Roskill e fai ai le tele o meafai a le atunuu.
Ma o se nofoaga ua sili ona matagofie ma e sili atu ma le fā selau tagata e mafai ona ofi ai.
Sa faaalia le finagalo o le susuga ia Samoa Mckee Te’o ua matuā faafiafiaina i laua ma le aiga, ona ua mafai ona ausia lea tulaga sa moomoo iai, ua leai se mea e toe popole ai le atunuu i ni mea e fai auā o lea ua maua le fale, iai le fale’aiga aemaise o le faili e mafai ona faafiafia ai le atunuu a o fai le taligasua.
Na auai le tele o aiga ma uo faapea le aufaipisinisi sa molimauina le saili malo o le susuga ia Samoa Mckee Te’o ma lona faletua ia Lisa Te’o.
O se tamalii na soifua mai i se aiga faipisinisi i totonu o le afioaga o Laulii ma o lea o loo faaauauina pea lea tautua i totonu o Niu Sila e pei ona amata mai ai le olaga
