O loo i Niu Sila sui a le Ofisa o Tagata Tafafao Maimoa mai Fafo a Samoa faapea ai nisi o sui o pisinisi tau turisi i Samoa e aofia ai le faletalimalo a le Amoa Resort ma le Tausala a Samoa.
Ina ua mae’a tausaga e 4 o se fiafiaga tele lea ua mafai ai ona toe faaauauina lenei faamoemoe e faatasi ai ma falauiloa le itu tau turisi i le kelope.
Saunoa le Ofisa Sili o Christopher Cocker e tusa ai ma le autu o lenei faamoemoe.
“O le tasi lenei o faamoemoe tele ma tāua e pei ona silafia o lea ua toe tatala femalagaa’iga.
“O se avanoa lelei lea e toe faamanatu ai ia tatou paaga ma i latou foi e ono asiasi mai le mafuaaga tatau e ala ai ona asiasi mai i le Pasefika.”
O le faletalimalo a le Amoa Resort i le motu tele i Salafai o loo auai ai foi i lenei faalauiloa.
Na ta’ua e le Pule Sili a le Amoa Resort, Elisapeta Siaosi o le faamoemoe lava ina ia mafai ona faataunuuina nisi o fuafuaga a le faletalimalo i lenei faalauiloa.
“O le sini autu lava ina ia mafai ona faasoa atu nisi o atina’e fou a le faletalimalo aemaise ai foi o faiga faapaaga lava ma nisi o kamupani tau turisi ma faletalimalo e maketi ai foi nisi o auaunaga.
“O se taimi muamua lenei ua mafai ai ona auai se sui mai lo matou faletalimalo i faalauiloa faapenei ma e iai le agaga maualuga o loo taulai mai pea le vaai a le itu tau maketi a Niu Sila i si o tatou atunuu i vaega tau turisi.
“O le agaga lava ia tele ni avanoa mo aufaipisinisi tau turisi i Samoa e faalauiloa ai auaunaga.
“E pei ona silafia o le taimi lenei o loo ua amata le tau malulu i le atunuu ae o le amataga lea poo se avanoa e ta’u atu ai i tagata o le taimi tonu lava lea e ao ona asiasi atu ai i Samoa o loo mafanafana le tau i le taimi nei.”
Na faafetaia ai e le Pule Sili a le Amoa le lagolago malosi a le Ofisa o Tagata Maimoa mai Fafo i Samoa nei faapea ai ma le Malo o Niu Sila.
