Ua tatala nei i tua le tamā matua 70 tausaga o le soifua o ia lea o Aitauia Ioasa Lemau, e faatali ai le toe tulai i le aso 16 o le masina nei o Oketopa mo le tuuina atu o sana tali, i moliaga e tolu a leoleo.
O ia moliaga e aofia ai le taumafai e faaoo le oti, faaoolima tuga, ma le umia o se aupega matautia o se agaese laititi.
O moliaga ia ua faamautu a leoleo faasaga ia Aitauia mai Lefagaoalii o loo tuuaia i le mataupu na saisai ai vae ma lima o se matai matua o lea nuu ona tui ai lea o le amo ae sa’esa’e i totonu o le afioaga.
O moliaga a leoleo e mafua i le umia e lē ua molia o se agaese laititi na ia faaoo ai se manu’a i lē na aafia.
O le tatala ai o lē ua tuuaia i tua, ua faatonuina ai e faamautu i Tanumapua i se tasi o ona alo, ma ia saini i le ofisa o leoleo i Tuanaimato ma tuuina atu lona tusifolau e taofia i le ofisa o faamasinoga.
