Ua tatala i tua mai le vaaiga a leoleo le Komesina Lagolago o le Komisi o Faigapalota ia Afualo Daryl Mapu i le lata i le 2 masina talu ona nofo taofia i le maea ai o se osofaiga a leoleo i lona fale i Nuu lea na maua ai ma le fualaau faasaina o le aisa faapea auupega malosi e lē faatagaina ma ni pulufana. 

I le faaiuga a le Sui Faamasino Sili le afioga Vui Clarence Nelson na ia faaalia ai e tatau ona totogi se tino i tupe e $5,000 tala o le surety ma taofia pepa malaga uma o lē ua molia, ia saini i le Ofisa o leoleo ma tapu ona ia taumafai e faafesootai molimau a leoleo faapea le tamaitai o loo molia faatasi i laua.

Ua maea ona tuu atu le tali tetee a Afualo Daryl Mapu i moliaga o le umia o le aisa ae o isi moliaga faaopoopo a leoleo e pei o le umia o ni vaega e fesootai i le faaaogaina o le fualaau faasaina o le aisa, umia o ututau ma le umia o laau malosi e lē faatagaina o le a faatoa tali iai pe a valaau lona faamasinoga i le Aso Gafua o le vaiaso fou.