O le afioaga o Vaiala na muamua faavae lana kalapu taalo le Vaiala Ulalei Sports Club e pei ona faailoa i se pepa o faasalalauga mai le kalapu, lea o loo tapena lana sauniga lotu faafetai mo le atoaga o le selau tausaga o le taaloga lakapi i totonu o le nuu.
O se sauniga o loo maopoopo iai le lagolago a tupu ma tamalii o le afioaga e pei ona faatulaga o le Aso Sa o muamua nei o le a faia ai i le malumalu o le Ekalesia Faapotopotoga Kerisiano Samoa i Vaiala o le a ta’ita’i ai le susuga i le faafeagaiga taulagi o le nuu le susuga Iese Uele.
Faaalia e le Pelesetene o le kalapu taalo a le afioaga le susuga Valuvalutumanu Siaopo Pese i le pepa o faamatalaga, o se sauniga o le a manatua ai tamafanau a le nuu sa fai lo latou sao i le afioaga e ala i le kalapu taalo aemaise i le atina’e o le taaloga lakapi.
eO nisi o alo ma tamafanau a Vaiala o loo aumau ma alala i atunuu i fafo e pei o Ausetalia ua faamoemoe e malaga mai e auai i le samiina o le selau tausaga o le taaloga lakapi a le afioaga.
