Na faalauiloa e le Palemia o Niu Sila Jacinda Ardern lea faiga fou mo femalagaiga i le va o atunuu e lua , ma o le aso ananafi i le aoauli na sainia ai loa e le Kapeneta mo le Aso 17 o le masina nei e toe tatala ai faigamalaga ao talia ai se faamaoniga mai le Pule Faatonu o le Soifua Maloloina a Niu Sila.

Taua e Jacinda e leo iai ni polokalame o tui puipui o le koviti o faagasolo i le taimi nei i totonu o le Atu Kuki ae o le faitau aofai o tagatanuu a lea malo e faatusatusa lea i le aofai o tagata e mafai ona fai i le aso e tasi a latou tui puipui i totonu Niu Sila.

Ae mo Samoa e silia i le toa 200,000 ona tagatanuu , lea ua maea ona fai tuipuipui a i latou e silia ma le to’a 7000. Ua savali nei i le lua vaiaso talu ona faagasolo tui puipui a Samoa, ua uma nisi o Itumalo e pei o Vaimauga 1 ma le 2 ae o le vaiaso nei lea ua faagasolo itumalo Vaimauga 3 ma le 4.

Talu ai ona o le siitia o le pepesi o le faamai o le Koviti i totonu o Initia ae faapea foi Fiti lea ua siitia ai ma aiaiga o le malaga atu o tagata i totonu o Samoa.

O le Aso muamua o Iulai e amata faamamalu ai le tatau ona umia e tagata malaga uma se tusi faamaonia ua maea lelei ona fai tui puipui e lua , o le vailaau o le AstraZeneca, Pfizer poo le Janssen ma e faali lenei tusi faamaonia i le malaevaalele .

O le isi vaega taua e tatau ona iai se tusi faamaonia mai se fomai ua maea ona fai suesuega o le toto o le tagata malaga ina ia iloa atili ai e le’o aafia i se siama o le Koviti 19. O nei aiaiga fou e tatau ona usitaia e soo se auvaa o vaalele faapea auvaa i luga o le sami e afea Samoa.

E pei ona silafia o le fuafuaga a le Pulega o Tagata Tafafao Maimoa mai fafo i Samoa ina ia tatala alavaa a le atunuu i le faaiuga o le tausaga nei.

Mo faigamalaga i le va o Niu Sila ma le Atu Kuki lea na faailoa e Jacinda e le’o iai se fuafuaga e faia siaki ae lei tuua le vaalele ae ua fautuaina tagata malaga ina ia iai pepa faamaonia mai le soifua maloloina ma e ono iai ni siaki eseese i totonu o le malae vaalele.

E leai se tasi e mafai ona malaga ae o loo iai ma’i o le tino ma o loo tālia pea pepa ma’i faamaonia pe e le’i maua foi.
Faailoa foi e le Palemia e 2 i le 3 faigamalaga i le va o atunuu e lua i le vaiaso mo lenei masina ona vaavaai lea i le toe siitia ai i isi masina.

 O le masina o Ianuari na amata ai le malaga mai o tagata o le Atu Kuki i Niu Sila e aunoa ma se nofo puipui