O le aso ananafi lea na tuuina ai i luga o le upega tafailagi a le Ofisa o Femalagaa’iga a Niu Sila le toe tatala ai o avanoa mo le Sei’ o le Quota a Niu Sila lea e fuafua e tatala i le aso muamua o le masina o Aokuso i le tausaga nei.
E tele nisi o ofisa malaga i le atunuu sa faasoa lenei faasalalauga i luga o upega tafailagi ina ua faailoa mai e le ofisa o femalagaa’iga a Niu Sila.
O le tausaga ua mavae lea na toe tatala ai lenei polokalame talu mai nai tausaga sa lē toe faia ai ona o le faamai pepesi o le Koviti-19.
O le tausaga foi ua mavae na amatalia ai ona faaopoopo le isi 550 avanoa mai le 1,100 o le fuainumera masani o avanoa o lenei Se’i ma maua ai le 1,650 o avanoa e faamanuiaina ai le atunuu mo visa nofomau i Niu Sila.
O aiaiga o nei avanoa ua na o i latou e 18 tausaga e oo atu i le 45 tausaga le matua e mafai ona apalai.
O le aso 31 o le masina fou e tapunia ai avanoa e apalai ai ma o le a faailoa mai i le masina o Oketopa i latou ua faamanuiaina.
