O se tasi lenei o auaunaga tāua a le Malo ua tele tausaga sa faatino ai o le utuina lea o sa a le Malo e faaaogāina ai nisi o pamu penisini tuma’oti.

O le taeao nei lea na tatala aloaia ai le pamu penisini fou i lona nofoaga i Tuanaimato e tusa lona tau aofai ma le $3 miliona tala.

I le saunoaga a le Minisita o Tupe Afioga Mulipona Anarosa Ale-Molioo na faaleoina ai se tala otooto o lenei atinae tāua a le Malo.

“O lenei atinae sa amata ona fuafua mai ina ua faatupulaia le tele o taavale a le Malo faatasi ai ma faafitauli sa tulai mai i le lē gafataulimaina lea e pamu penisini o manaoga ma vaega moomia a le Malo.

“O lenei atinae sa faatupeina uma lava e le tatou Malo, o lenei tau e aofia ai le tasi eka atoa o le fanua o le ‘afa eka o loo iai le pamu penisini, ofisa faapea ma nisi o fale o le a fuafua e teumaluina ai faamaumauga a le Matagaluega o Tupe.

“O lenei pamu penisini e 4 ona dispensers e utu ai taavale e tolu tane i lalo o le eleele o loo teumaluina ai le tiso ma le penisini i lona tele e 25,000 lita mo le tiso ma le 15,000 lita mo le penisini.”

Na ta’ua foi e Mulipola ua mae’a faatotogaina lenei pamu ma ua mae’a ausia tulafono aemaise le saogalemu lautele ina ia aua ne’i tulai mai se faalavelave e ono aafia ai se soifua.

O lenei atinae sa tele vaega sa taulai ai i lona taumafaiina mai le amataga.

“O le a telē se faasao mai le lisiina o isi pamu penisini tuma’oti mo le faatinoina o ana auaunaga ma o le a fesoasoani tele lenei atinae i le vave tali atu aemaise tulaga o femalagaa’iga i taimi o faalavelave faafuasei e aofia ai lologa, afā, mu ma isi faalavelave.

“O le a faafaigofie faatinoga o le auaunaga i le mafai lea ona tali atu i manaoga a Matagaluega uma aemaise le faatupulaia pea o taavale a le tatou Malo.

“O le a mafai ai loa ona utuina ai ma taavale a faalapotopotoga tuma’oti ma isi ofisa a le Malo i se taimi o i luma.”

O le isi ‘afa eka i tua e le o nofoia i le taimi nei ae o loo fuafuaina o le a faamautu mai ai le vaega o felauaiga tau taavale mo le taligamalo mo le fonotaga a Taitai o Malo a le Taupulega i le tausaga fou.