O le vaiaso lenei ua amatalia ai taualumaga o le fono a ofisa o vaaitau a le Pasefika lea o loo faagasolo i le taimi nei.
O le lona 6 ai lenei o fonotaga lea o loo auai le silia ma le 160 i latou uma o faauluuluga ma sui o ofisa a vaaitau a le Pasefika e talanoaina mataupu tau i le auaunaga i le Pasefika.
I lipoti mai le ofisa o siosiomaga a le Pasefika le S.P.R.E.P. a o faagasolo ai le amatalia o lenei fonotaga na faia ai se tulai faaaloalo a sui usufono e manatua ai tagata o i Maui i Hawaii a o feagai ai ma tulaga pagatia i le sasao ai o se afi ua lē gata ina faaumatia ai le siosiomaga ma le tele o meatotino ae o soifua ma’umau.
O le Taitaifono sa seei mai i le tofiga o le Ofisa Sili o le Matagaluega o le Siosiomaga i Samoa Lealaisalanoa Frances Reupena na ia faailoa le tulaga faigata na iai i tausaga ua mavae i faalavelave faalenatura faatasi ai ma le faama’i pepesi o le koviti.
“E ui i nei mala faalenatura o loo lofia ai atunuu o le Pasefika o loo avea ma faafitauli i le soifua manuia o tagata o loo tumau pea le galulue faatasi ma le felagolagomai i o tatou tofiga ina ia malupuipuia o tatou atunuu.
“E momoli ai le faamalo i sui mamalu o lenei fonotaga i le auai ai o nisi mai auaunaga o faalavelave faalenatura ina ia auomanu o tatou faiva e faataunuu moemitiga auā le saogalemu o o tatou tagata mai nei faalavelave.
“E lē o se tautua e faigofie ona faatino ae faafetaia ai i tatou uma lava ona o la tatou auaunaga faia pea.”
Na faamanatu foi e le sui mai le faalapotopotoga o vaaitau a le lalolagi Ben Churchill o loo iai vaega e ao ina moomia ai le faamautuina o le malupuipuia o tagata.
“O le faalavelave e pei ona aafia ai Toga i le tausaga ua mavae ma le faalavelave i Maui Hawaii e ao ina nofo sauni ma lava tapena atunuu uma i auala ma vaega e tali atu ai.
“O nei foi faalavelave faalenatura o loo vaaia pea le galulue faatasi e fesoasoani atu i ē o loo aafia i le faaaogāina o resources ae peitai e manaomia le sili atu o vaega e fesoasoani atu ai i taimi faigata.”
E mae’a le fonotaga lenei ona sosoo ai lea ma le fonotaga lona 3 a Minisita a Ofisa o Vaaitau i le Pasefika i le vaiaso lava lenei.
