Ua patipatia, ma faaulufaleina ma le fiafia e tagatānuu o Otara ma pitonuu lalata ane, le maua ai e ia faaitu o se tasi o auaunaga tāua i Otara, e pei ona tatala aloa’ia ai le auaunaga faalesoifua mālōlōina poo se clinic, e faatautaia mo le 24 itula mo aso uma e 7 o le vaiaso.
O le auaunaga e tali atu ai i ni gasegase poo ma’i o loo moomia vave le fesoasoani ma togafitiga.
Faamanino o se tasi lea o fuafuaga o le a fesoasoani tele i le tau tuumāmāina o le tulaga vevesi ma le to’atele e aga’i atu i le falema’i o Middlemore i le vaega o le emergency.
O lona uiga o le a mafai ona aga’i le to’atele i lea falema’i poo le clinic i Otara e aunoa ma le tau aga’i i Middlemore Hospital, aemaise lava i latou o loo faanatinati ona fia maua ni togafitiga.
I lipoti mai le PMN, na amata faatino mai ona faagasolo galuega mo lenei falema’i i le aso 19 o Ianuari, ma o se taimi muamua lea ua faia ai lea auaunaga faapea i le Watford Road clinic.
Faamanino mai e le faatonu o lea auaunaga, Dr Sivakumar Vallipuram, o se fuafuaga ua leva ona faatalitali ai le to’atele ma o se mea ua leva ona tatau ona fai.
Faaalia foi e foma’i o le tele o gasegase e aga’i atu i Middlemore mo ma’i e pei o le flu ma nisi e faitau itulā o faatalitali mo se taimi e vaai ai le foma’i, ma iu ai lava ina toe aga’i i le fale ona o le umi o le taimi e faatali ai.
Ta’ua e mafai ona aga’i atu tagata e aunoa ma le vili mai i totonu e faatonu se taimi, faapea i latou e lē o resitala i lea falema’i, ma e lē suia tau e tusa lava poo le ā le taimi e susū atu ai le ma’i.
Puna o Faamatalaga: https://pmn.co.nz/read/local-democracy-reporting/tara-clinic-launches-24-7-urgent-care-to-ease-pressure-on-middlemore-hospital
