Ua lipotia na tata’e e leoleo (tulou) le faamalama o se taavale ina ia aumai ai i fafo ni tamaiti se toalua sa iai totonu o le taavale.
Lipotia e le 7news o tamaiti e toalua e tasi le tausaga ma le fa tausaga sa iai i totonu o lea taavale sa paka ise taulaga faatau i le itu i matu o Sini ae alu le tina e fai lana faatau.
O nisi tagata faatau na o latou logoina leoleo i tamaiti ia o loo i le taavale a faavave ai loa ona fai gaioiga mo le aumaia i fafo o tamaiti. Na taumafai leoleo e tatala le taavale peitai e le mafai ma i’u ai ina tatae le tioata ae tatala le faitotoa.
E lei iai se tasi na afaina ai faapea foi ma nai tamaiti ae ua maea talanoa atu leoleo i le tina o tamaiti ma o loo faia pea lava suesuega. O faamaumauga a le NRMA o loo taua ai e lata i le 1,900 tamaiti e laveaiina mai i tulaga faapea talu mai le tausaga talu ai.
