O nisi tagata o le Pasefika ua lipotia na tasui o latou igoa i ni igoa papalagi ma le faamoemoe ia faigofie ai ona maua ni galuega.
O se tasi lea o iuga o se suesuega na faia e le Komisi o aiātatau le Human Rights Commission la na faia ai sa latou suesuega i mafuaaga o le tulai mai o le Pacific Pay Gap e pei ona faaigoaina ai i le faaperetania.
I lea lipoti ua faailoa ai o soo se tālā o loo mauaina mai totogi e maua e le papalagi le tālā e faatusa i le 81 sene e maua e le tagata Pasefika i le itupa lea o alii ae mo tamaitai e maua le 89 sene e papalagi ae maua e le tamaitai Pasefika le 81 sene.
O le komesina o avanoa tutusa i galuega poo le Equal Employment Opportunities Commissioner o Saunoamaalii Karanina Sumeo na ia ta’ua e pei ona lipotia e le Herald o le 25 pasene o le eseesega i totogi e mafua mai i le eseesega o tulaga o loo iai i le taimi nei aemaise pe afai e maualuga le tau o le soifuaga ma o loo tau toe taumafai le lalolagi mai aafiaga o le faamai.
Na ta’ua e Saunoamaalii o i latou sa faatalanoaina i lenei lipoti sa o latou faasoa ane ni tala faamomoiloto aemaise foi nisi tagata o loo feagai ma ni tulaga faailogalanu i totonu o fale faigaluega ma nisi ua ta’ufaatauvaaina i galuega ona o le lanu o latou tino poo le ta’uga o o latou igoa.
O le lipoti la lenei ua faaigoaina Voices of Pacific People, eliminating pay gaps ua faalauiloa aloaia i le asō ma e aofia ai le silia ma le afe o tagata Pasefika faigaluega, tagata e ana galuega ma sui o iuni mai Niu Sila atoa, lea sa faia ai faatalanoaga.
O se tasi la lea o iuga na maitauina o faiga faailogatagata i igoa o le Pasefika ae o le itu aupito tāua e pei ona faailoa i le lipoti, o le auaunaga a nei tagata i le atunuu, o le toatele o tagata Pasefika e tumau lo latou faaaloalogia o a latou auaunaga i soo se kamupani o loo galulue ai.
