O le mataitu ai e le komiti o le avamalosi o le gaosiga o ia oloa i totonu o le atunuu ina ia siitia le tulaga saogalemu mo le faaaogaina e le atunuu.
Aemaise ia mulimulita’ia e le aufaipisinisi o loo faatauina atu i tagata lautele tulafono i le umia o laisene e faatau ai, ua amata ai i le vaiaso nei se galuega a se komiti galulue poo se task force, i le siakiina o pisinisi o loo faatauina le avamalosi.
Faaalia e le afioga i le Sui Palemia o le Minisita o Tiute ma Tupe Maua o le taitaifono o le Komiti o le avamalosi, le afioga Tuala Tevaga Iosefo Ponifasio, e lua ni pisinisi na maua i se siaki na faia i Savaii.
O ia pisinisi sa faatauina le avamalosi e aofia ai beer ma fagumalosi ae leai ni laisene. E ono ni nofoaga i Upolu o loo agai iai le galuega a le komiti galulue i le sailia lava o gaioiga solitulafono faapea.
I taumafaiga a le taitaifono ma le komiti o le avamalosi e sailia le maualuga o le sipili le alcohol o loo ave i fagumalosi ua faailoa e Tuala, ua le o toe faagaioia se tasi o pisinisi sa gaosia le fagumalosi o le Rova, i le tuanai o sailiiliga na taofia ai se uta o le sipili o le ethanol sa aumai mai Saina e gaosia ai lea ituaiga o fagumalosi.
O lea uta ua tuuina atu i le nofoaga o suesuega faasaienisi mo a latou sailiiliga.
