O le ‘oa o eleele o le atunuu o Iran i lona tamaoaiga tau suāuu o se oloa mana’omia e ono tutupu mai ai ni aafiaga i le lalolagi ma tula’i mai ai ni aafiaga ogaoga e lē gata i le sii maualuga ai o le tau o suāuu, ae faapena atu ai ma le tau o le soifuaga i oloa eseese.
O loo silasila toto’a le malo o Samoa i lea tulaga ma ua faailoa ai e le Palemia o le atunuu ua faia tapenaga mo le ono tula’i mai o ni aafiaga ma’ale’ale ona o le taua o loo faia nei i Sasa’e Tutotonu.
Ua taatia atu se fanoga o Samoa i le Palemia o Niu Sila i ni auala e fesoasoani ai pe a tula’i mai ni tulaga ogaoga i le faaitiitia o suāuu e maua ma isi vaega e mana’omia ai le fesoasoani a lea malo.
Se finagalo o le afioga i le Palemia susuga Laaulialemalietoa Leuatea Polataivao Fosi i le feiloa’iga ma tusitala i lenei vaiaso.
