E tasi le aso o lea ua tapena iai le afioga i le Konesula o Samoa i Aukilani, le afioga ia Afemata Palusalue Faapo II ma le tafatolu i Aukilani e aofia ai le Fono Faufautua a Samoa, Pacific Leadership Forum faatasi ai ma le mafutaga a faifeau soofaatasi, e faataunuuina ai le faamanatuina o le Sisigafu’a a Samoa i totonu o Aukilani. 

O le Aso Gafua aso malolo aso 3 o Iuni o lea ua fuafua iai lenei faamoemoe tāua i le Maota o Samoa i Magele auā o le aso lelei lea o loo malolo uma ai le tele o galuega ae maua ai le avanoa e auai faatasi uma ai tagata Samoa e patipatia le faamanatuina o le 62 tausaga talu ona tutoatasi Samoa. 

O polokalame o le aso: 

9.30am – Tatala faitotoa mo le agai atu o le atunuu. 

10.00am – Faafeiloai le mamalu o le auvalaaulia e le Fofoga o le aso, le afioga ia Leiataua Seiuli Savea Al Harrington Lavea.

Ona sosoo lea ma le sauniga lotu e saunia e le mafutaga a faifeau soofatasi. 

O le afioga i le Konesula o le malo o Samoa i Aukilani ia Afemata Palusalue Faapo II o le a saunoa i le saunoaga autu a le malo o Samoa i le tāua o lea aso, ona sosoo lea ma le saunoaga a le tamaitai faipule o Magele ia Lemauga Lydia Sosene. 

E mae’a saunoaga autu o le aso ona sisi lea o tagavai o atunuu e lua o Samoa ma Niu Sila ma faagasolo ai lea o nisi o faafiafiaga a aoga o lea ua lautogia e faafiafia i lenei faamoemoe, ona taualuga lea i se leo mai le ta’ita’ifono o le Fono Faufautua a Samoa le afioga ia Tofilau Ted Stanley. 

O le polokalame ua faataoto nei mo le Sisigafu’a o loo mulimulitai lava i faiga faavae o le malo o Samoa e pei ona taoto mai ai le faatinoina o polokalame o Sisigafu’a i tausaga taitasi. 

Ma e lē o iai lava se mea o suia.