Sa fafau a’e le manulauti o le ulua’i faatasiga mo lenei tausaga 2025, mai upu a se tasi o ta’ita’i ta’uta’ua i le lalolagi, na ia saunoa ai i se faauigaga e faapea, ‘E lē o taimi uma e taulau manuia ai pe to’ilalo ai foi; ae o le mea tāua ia maua pea le lototele e galue ai ma finau ai pea.’ (“Success is not final, failure is not fatal: it is the courage to continue that counts.” – Winston Churchill)
O le ulua’i fonotaga lea a le Itumalo Palauli Numera Muamua mo le 2025, e pei ona auai lo latou sui faipule, le Afioga Mulipola Anarosa Ale-Molioo, ma su’i o afio’aga uma e 6 o loo i totonu o le itumalo, ma o se laasaga tāua mo le faalauteleina o atina’e e ta’imua ai lava sui uma o afio’aga o loo i totonu o le itumalo.
O le autū o lea fonotaga o se faamanatu i afio’aga uma ina ia amata ona tapenapena a latou faatalosaga mo ni atina’e poo nisi lava fuafuaga o le a moomia ai fesoasoani tupe i le vaega o totoe o le $1.8 miliona mo le itumalo, ma ia faamautinoa o nei poloketi o le a faatulaga ai talosaga, o loo ogatusa ma mana’oga o tagata ma afio’aga aemaise atina’e o loo ave i ai le faamuamua.
O lenei seleni ua faameaalofa atu i itumalo, o se avanoa tāua mo le faaauiluma atili o galuega faaauau ma faaleleia atili le soifua manuia o latou tagata.
E lē gata i lea, o le fonotaga foi lea na folasia ai i lumāmea le Audit Report mo le $2 miliona lona lua, ina ia faamanino ma faamaioio mea uma mo i latou o loo fai sea iai.
O se fonotaga e lē gata ina folasia fuafuaga faataatitia, ae na maua foi avanoa e fai ai fesili ma faamalamalamaga, ina ia toe faamalosia atili fuafuaga o loo taula’i atu i ai afio’aga ma faalapotopotoga, ina ia avea o ni pulega lelei ma aogā foi le faatinoga o poloketi.
O le fonotaga foi lea na maua ai le avanoa e faailoa ai i sui mai afio’aga ta’itasi lipoti lata mai i le tulaga ua tula’i mai ai nisi o poloketi o loo faagasolo pea aemaise foi le faatulaga ai o ta’iala mo nisi polokalame faama’ite i le lumanai.
Sa maua ai foi le avanoa e faamalosi’au ai i sui o afio’aga na auai, ina ia latou tausolomua e amata faatalanoa le ave o le faamuamua i poloketi o loo i totonu o vaega e 10 o loo ta’ita’ia taumafaiga mo atina’e.
O le fuafuaga lea a le itumalo, ia faatulaga lelei faatalosaga i totonu o vaega nei e ao ona ave iai le faamuamua, ina ia faamautinoa ai e le itumalo o loo latou faaaogā auala e mafai ona galuea’ina ma iai ni aafiaga lelei.
Ua faaalia e le pepa o faamatalaga mai le Matagaluega o Tina ma Tamaitai Atina’e o Afio’aga ma Agafesootai, o lenei fonotaga a le Itumalo o Palauli Muamua, ua faailoa ai le naunauta’iga o afio’aga uma o le itumalo ina ia galulue faatasi mo le sologa lelei o a latou fuafuaga.
O le naunauta’iga o le itumalo ina ia amata lenei tausaga o le 2025, ma se fuafuaga poo se faamoemoega ina ia fafau a’e se lumanai lelei mo tagata uma o le itumalo.
