O lea ua tapena atu nei le Tausala filifilia o Samoa 2023-2024, le tamaitai lalelei o Moemoana Safaato’a Schwenke mo le tauvaga tele e saili ai se Tausala poo le Lalelei o Motu o le Pasefika, le Miss Pacific Islands.
O le a amata lea tauvaga i le aso 28 o le masina lenei o Ianuari seia oo i le Aso Sa, le aso 4 o le masina fou o Fepuari 2024.
O lenei tauvaga o le a talimalo ai le atunuu o Nauru ma o le uluai taimi foi lenei ua faia ai lea tauvaga i lenei atunuu talu mai ona faagasolo tauvaga e saili ai se Tausala o le Pasefika poo le Miss Pacific Islands.
Ua faailoa e Moemoana i le upega tafailagi a le Tausala o Samoa ua lagona lona faagaeetia e avea ai ma sui tauva o le tatou atunuu i lea tausinioga o le a auai tamaitai tausala o atunuu eseese o le Pasefika.
Faaalia e le tausala o Samoa o le 2023 i le 2024, o se faaaloalo maualuga ia te ia lona avea ma avefu’a mo Samoa i le sailiga o se Tausala o le Pasefika, ma ia faaalia ai o le viiga e toe faafoi i le Atua i lona alofa ma lona agalelei.
O le Aso Sa mulimuli o le masina lenei o Ianuari e amatalia ai le polokalame o le Tausala o le Pasefika.
