E silia ma le afe sui usufono mai atunuu o le lalolagi o loo ulufale nei i Dubai auā taualumaga o le fonotaga tele lona 28 a Malo Aufaatasi e patino lea i suiga o le tau ma le siosiomaga lea e amatalia i le faaiuga o le masina nei.

Ae mo le li’o o atumotu laiti poo le Alliance of Small Island States (A.O.S.I.S) lea na faagasolo ana tapenaga e ala i se fonotaga na amatalia i le aso ananafi e saunia lelei ai sui usufono e ala i mataupu e ave ai se leo i le fonotaga tele e pei ona lipoti faamauina e le Ofisa o Polokalame mo le Siosiomaga o le Pasefika le Secretariat of the Pacific Regional Environmental Programme (S.P.R.E.P.).

O Samoa o loo Taitaifono i le A.O.S.I.S. ma o se mataupu o loo laualuga ai tapenaga a atumotu laiti o le faamautinoaina lea o le faatumauina o le 1.5 tikeri e faaitiitia ai le vevela o le osone mai faatinoga e pei ona faaleagaina ai le ea.

O le Sui o Samoa i totonu o le faalapotopotoga o Malo Aufaatasi, Fatumanava-o-Upolu III Dr. Pa’olelei Luteru i lana saunoaga i le amataga o le fonotaga a le A.O.S.I.S. e tusa ma lenei mataupu.

“E lē mafai ma e alagatatau ona aua ne’i tatou faasee ese mai i lenei vaega ua autasi iai ma ou te talitonu o loo iai nisi talanoaga e talia ai se isi vaega itiiti atu ma le 1.5 sa faatulagaina ma ou te talosaga atu ai ina ia o tatou tutu faatasi ina ia tumau ai i lenei vaega e lē mafai ona toe fetuunai.

“Ia mauaa ma tutu faatasi auā o se isi fetuunaiga o lea lava tatou te malamalama ai i tua atu, e leai foi se aogā e talanoaina ai le tele o mataupu ae lē mafai ona tatou ausia lenei vaega tāua.”

O le fonotaga 28 e pei ona faataatia mai ai e le feagaiga o le Paris Agreement o le a faailoa ai mo le uluai taimi le iloiloga o taumafaiga o loo faatino mo le tetee atu ai i suiga o le tau poo le Global Stocktake (GST).

“O le Global Stocktake o se mau lea e vaai ai se isi auala ma e moomia le silasila toto’a i vaega e toe tomanatu ai ia tatou taiala.”

“Ou te faailoa atu o nei gaioiga uma e mo tatou uma lava, e lē mo se atunuu e tasi poo se itulagi e mo tatou o atunuu laiti tau atia’e.”

Talu mai le tausaga 1990, sa avea ai le A.O.S.I.S. ma li’o e fai ma sui o atumotu laiti tau atia’e e 39 e faaleoina le tulaga pagatia o iai nei atunuu e aofia ai ma Samoa ma o le fonotaga a le C.O.P28 o le a faaauauina ai pea e Samoa le avea ai ma Taitaifono.

“Ou te talitonu o aoaoga mai i le fonotaga 27 o loo manino mai e tele ni vaega o loo tatou naunau ai ma le faamoemoega ae o le tele o taimi e tatou te toe oese ma le agaga faanoanoa ma o le faamoemoe o le fonotaga o le a alo atu iai o le a tatou oese ai ma ni lagona fiafia e ese mai lagona faanoanoa sa iai i fonotaga sa iai i la tausaga.”

O lenei fonotaga o le a usuia o le a auai ai Taitai mai le Pasefika ma a latou auusufono e taumafai se leo o le Pasefika ma ona tagata ina ia faaauauina pea faatinoga mo le saogalemu ma le puipuia ai o ona siosiomaga mai suiga eseese o le tau.

O le aso 12 o le masina fou e mae’a ai lenei faatasiga.