Ua tapena le faafaletui o le vaega faaupufai e puipuia aiātatau a tagata le HRPP (Heropp) e usuia se latou fono e faatalanoa ai ni teuteuga i le faavae o le pati faaupufai, ma soalaupule ai foi ma le aiaiga o lona faavae e faasino i le filifilia o lona taitai.
Ua faailoa ia vaega e le taitai o le vaega faaupufai ua faamalolo le tumau mo le 2 tausaga le susuga Tuilaepa L Sailele Malielegaoi, i le feiloaiga ma tusitala i le Aso Tofi a tea nei ina ua faaali sona finagalo i le mae’a ona ia tauaaoina tusi faamavae a sui faipule o Faleata 4 ma Siumu, ua solomuli ese ai mai le toe avea ma sui faipule o le vaega faaupufai.
O le feiloaiga lea ma tusitala na faailoa ai e Tuilaepa, o teuteuga na faia i le tulafono o faigapalota e faasino i le faamavae o se sui faipule mai lana pati faaupufai sa tauva ai, ua avanoa ai ma nofoa o o la itumalo ma ua tatau ona toe foi e fai palota laiti e toe saili ai nisi sui usufono o itumalo o Faleata 4 ma Siumu lea o loo seei ai le tofa Ale Vena Ale ma Tuuu Anasii Leota i nofoa o le Palemene.
Ua faaalia e ia sui faipule o laua ua avea nei ma sui tutoatasi e le lagolago i se isi vaega faaupufai.
Le susuga Tuilaepa L Sailele Malielegaoi, o le taitai o le vaega e puipuia aia tatau a tagata.
O le amataga o lenei vaiaso e aumai ai se finagalo tusitusia o le afioga i le Fofoga Fetalai e tusa o le tulaga o le mataupu lenei, e pei ona ia tauaaoina le tusi a le taitai o le vaega e puipuia aiāfeeeeetatau a tagata, ua logoina ai le susuga Papalii Lio Oloipola Taeu Masipau, i le avanoa o nofoa o Faleata 4 ma Siumu ma ua fia maua e le taitai le susuga Tuilaepa L Sailele Malielegaoi, se finagalo o le Fofoga Fetalai i se tapenaga o se aso e faia palota laiti a ia itumalo e lua.
Peitai ina ua maua se fesootaiga i le fofoga o le fono, na ia faailoa mai ai o le mataupu lenei e na o le faamasinoga e maua ai le tali, ae o lana silasila i le faamavaega a le tofa Ale Vena Ale ma Tuuu Anasii Leota, o loo tumau pea ona la tauaveina nofoa o o la itumalo i le Palemene o Samoa.
